Во струшкото село Лабуништа, ќе биде поставено 25-метарско државно знаме на Албанија. Постаментот и бетонската подлога каде ќе биде поставено знамето се веќе направени. Знамето според информации на А1он, треба да биде поставено деновиве, но се чекало доаѓањето на лидерот на ДПА, Мендух Тачи, кој треба да присуства на свеченост кога знамето ќе биде подигнато.
Албанското знаме според кажувања на жители на Лабуништа требало да биде поставено пред изборите, но било одложено за после изборите. Лабуништа е поранешна општина во која 90% од населението се македонски муслимани односно торбеши, но кои во голем дел се членови и активисти на најголемите албански партии ДУИ и ДПА.
Победата на новиот струшки градоначалник Зијадин Села беше најубедлива токму во Лабуништа, каде разликата во однос на македонскиот кандидат беше повеќе од 2.000. Инаку натписи со албански симболи, патоказни табли каде имињата на населените места се испишани само на албански јазик последните неколку месеци станаа практика во Струга, нешто на што никој од надлежните државни институции воопшто не реагира.
Мики Трајковски