Здружението на приватни лекари бара и Фондот за здравство да добива пари од акцизите за алкохол. Претседателката на Здружението д-р Лилија Чолакова Дервишова денеска на прес-конференција изјави дека приватните лекари предлагаат половина од акцизата да ја добие ФЗОМ, а половина Министерството.
Според Чолакова Дервишова нивниот предлог ќе ја подобри работата на ФЗОМ и услугите кои тој ги нуди.
Акцизата од алкохол и цигари ќе придонесе и за редовна исплата на месечниот надоместок кој го добиваат лекарите од приватното здравство.
-Матичните лекари 20 години добиваат капитација. Зошто да не направиме позитивни чекори во таа насока и да се изедначи приватниот со државниот сектор бидејќи тие добиваат редовно плата, а ние деновиве ќе добиеме за март, а сега сме јуни, потенцира Чолакова Дервишова.
За неполн месец ќе почне примената на изменетиот Закон за здравствена заштита. Еден денар од литар пиво и 40 денари од увезен чист алкохол ќе одат во касата на Министерството за здравство. Според предлогот на министерот, овие пари ќе се трошат за превентивни програми.