Српскиот Кризен штаб соопшти дека како одговор на влошената епидемиолошка ситуација во земјата и зголемениот број на новозаразени и починати од Ковид-19, донесена е одлука земјата да се „затвори“ претстојниот викенд.
Како што објасни главниот српски епидемиолог д-р Предраг Кон, ова ќе значи дека од сабота напладне до понеделник наутро во шест часот, во земјата ќе бидат затворени сите продавници освен оние кои продаваат храна, лекови и горива.
Кон додаде дека е донесена и одлука од понеделник сите средни училишта да преминат на онлајн настава, додека основците ќе продолжат да одат на училиште, иако имало предлог и тие да преминат на виртуелна настава, кој не е прифатен.
И покрај заострувањето на заштитните мерки против коронавирусот, во Србија и натаму ќе работат театрите, а ќе може да се одржат веќе закажаните спортски настани, но без присуство на публика. Од понеделник, повторно ќе работат сите продавници и угостителски објекти, а мерките се враќаат како пред „затворањето“.