Најавеното невреме со силни врнежи, кое ја зафати цела Македонија, денеска попладнево пристигна и на југот од државата. Облаци од силен пороен дожд проследен со краткотраен град во 17:45 минути ги изненади пешаците и работниците на отворени простори во Гевгелија.
Петнаесетминутните интензивни врнежи преплавија дел од улиците во градот поради слабата пропусна моќ на атмосферската канализација.
Преплавени останаа и некои од дворовите од индивидуалните куќи поради неможноста земјата да ја прими сета влага што наврна попладнето.
Утринава од регионалниот Центар за управување со кризи беше проследено соопштение со најава за нестабилно време во централните и источните делови на земјата, но невремето пристигна и на југот од државата.
За состојбите во другите терени низ населените места од општината сè уште се собираат податоци, како и за можни штети на земјоделските посеви низ гевгелискиот регион.
