Спиро Ристовски во 2017 година немал никаква функција во ВМРО-ДПМНЕ, ова го потврдија повеќе сведоци на денешното рочиште за судењето за организаторите на настаните во Собранието од 27 април 2017 година.
Сведокот Зоран Коњановски, како долгогодишен член на ВМРО-ДПМНЕ, рече дека Спиро Ристовски во 2017 година немал никаква функција во ВМРО-ДПМНЕ, бидејќи како што кажа Ристовски имал политичка дамка како поранешен член на ВМРО-НП.
Прашан дали бил член на вибер групи за комуникација меѓу функционери и членови, Коњановски рече дека бил и уште е дел од повеќе вибер групи, за размена на податоци, конкретно за проблеми во секторите во кои има познавање.
-Јас не сум учествувал во таква група со коментари кои се однесувале на протестите. На 27 април 2017 година бев во посета на општински комитет Валандово на средба со земјоделци, бидејќи бев препознаен како поранешен министер, изјави Коњановски.
На прашање од обвинителката Русковска, дали Ристовски имал политичка дамка кога бил назначен за министер, Коњановски рече дека во владата на ВМРО-ДПМНЕ имало лица кои биле поранешни членови и на СДСМ.
Сведокот Давор Политов, кој во 2016-17 бил вработен во МОН, додека заменик министер бил Спиро Ристовски, рече дека на 27 април 2017 година требало да имаат заеднички настан со министерот Пиштар Љутфиу – посета на студентскиот дом Пелагонија.
– Имавме вообичаена подготовка пред настанот, кој требаш да биде во 12 часот. Половина час пред тоа, од министерот Пиштар побараа дали може сами да го изведат настанот. Штом се одложи тој настан, Спиро рече дека ќе оди дома, каде имал некои обврски, зошто тогаш беа во процес на селидба. Јас останав до крај на работното време, по што си заминав дома, рече сведокот.
На протестите „За заедничка Македонија” рече дека присуствувал два пати, на сопствена иницијатива.
Втор сведочеше Ристов Драган, кој во 2016-17 бил претседател на општински комитет на ВМРО-ДПМНЕ Делчево.
– Немаше одлука за поддршка на изборите, секој индивидуално си одлучуваше дали ќе учествува. Јас немам влијаено на членови на месни и општински комитети за учество на протестите, рече сведокот.
Тој посочи дека немал контакт со Спиро и Миле за организирање на лица за протестите, како и дека на 27 април 2017 година бил во Делчево.
Билјана Трајковска, која во 2017 година работела во МОН, како шеф на кабинет на заменик министерот Спиро Ристовски, рече дека на 27 април 2017 година, само што се вратила од патување во Италија, си пишале со Спиро кога треба да се врати на работа.
– Ми кажа дека дента планира да го посети министерот Абдулаким Адеми, кој бил болен, изјави сведокот.
Сведокот Игор Атанасовски, кој во 2017 година бил претседател на месен комитет на ВМРО-ДПМНЕ Трубаерово, рече дека како комитет немале став во врска со протестите на „За заедничка Македонија”.
Прашан дали имал контакт со Спиро и Миле за протестите, сведокот рече, дека немал никаков контакт.
Случајот се наоѓа во доказна постапка и го води судијата Илија Трпков, а застапник на обвинението е Вилма Русковска.
Следното рочиште е закажано за 1 февруари, за кога се повикани повеќе сведоци од одбраната на Спиро Ристовски.
Обвинети во овој предмет се поранешниот претседател на Собранието, Трајко Вељаноски, ексминистрите за транспорт и врски и за образование, Миле Јанакиевски и Спиро Ристовски, како и поранешниот директор на УБК, Владимир Атанасовски.
Тие се товарат дека сториле кривично дело „терористичко загрозување на уставниот поредок и безбедноста“.