Компанијата ОНЕ, избрана на тендер да ја спроведе дигитализацијата во Македонија, денеска соопшти дека е комплетно подготвена целиот процес да профункционира на предвидениот датум задутре (1 јуни).
Од ОНЕ тврдат дека сите национални и регионални телевизии во Македонија кои добиле лиценца од Советот за радиодифузија и кои потпишале договор со нив и навреме ја обезбедиле потребната техничка опрема на 1 јуни ќе бидат емитувани дигитално преку платформата на ОНЕ.
До овој момент, според соопштението, на дигиталната платформа на ОНЕ се поврзани сите национални телевизии и дел од регионалните. Останатите регионални телевизии ќе бидат приклучени на дигиталната платформа, како што ќе ги исполнуваат техничките услови.
– За секоја новододадена телевизија ОНЕ континуирано и навремено ќе ги информира гледачите преку порака која ќе се појави на нивните ТВ екрани, доколку имаат дигитален приемник (сет-топ-бокс) од ОНЕ, а сите останати на инфо каналот, како и на веб страната на ОНЕ, во доменот „дигитализација“, соопштува ОНЕ и апелира до граѓаните кои досега ја следеле телевизиската програма аналогно со антена, доколку не набавиле дигитален приемник, тоа да го сторат до 1 јуни за да можат да ги следат програмите дигитално.
Дигиталните ТВ приемници на ОНЕ (сет-топ-бокс) уреди можат да се набават во сите продажни салони и дистрибутивната мрежа на ОНЕ и во поголемите ланци на продавници за техничка стока во Македонија (АМЦ, СЕТ Компјутери, НЕПТУН), односно во над 1.000 продажни места низ земјата.