Овој викенд имало разговори помеѓу владини преставници на Бугарија и Македонија кои се одвивале во Софија. Овие информации ги потврдува и Зоран Заев коj рече дека се разговарало на ниво на работни групи под раководство на македонскиот и на бугарскиот министер за надворешни работи – рече на прес конференција членот на Извршниот комитет на ВМРО-ДПМНЕ, Стефан Андоновски.
„Заев го смета македонскиот народ за експериментална нација, која може да прифати сè што ќе и се сервира на маса. Прифаќајќи патокази и анекси, Заев го поплочува патот кон поразот на македонскиот идентитет. Ветувања кои сте ги давале кај високи функционери во Софија, сега морате да ги испорачате. Затоа го повикуваме македонскиот народ на протести. Масовни протести. Во секој град, во секое село. Продолжуваме, сите заедно за да не биде предоцна. Да излеземе на улиците, почитувајќи ги здравствените мерки и заштитувајќи се себеси и најблиските, и на мирен и демократски начин, да им покажеме дека сме горди, достоинствени Македонци кои не отстапуваат од своето. Денес ве повикуваме да ни се приклучите во Свети Николе, Крива Паланка, Кратово, Струмица, Гевгелија, Неготино, Крушево, Македонски брод, Кичево, Гостивар и Струга“ – рече Андоновски.