Речиси сите грчки медиуми, засега без коментар, јавуваат за посетата на началникот на ГШ на турските вооружени сили генерал Неџет Озел на Македонија, нагласувајќи дека тој одржал состаноци со цел продлабочување на соработката меѓу двете земји.
За грчките медиуми е значајно тоа што македонскиот претседател Ѓорѓе Иванов и Озел на средбата во Скопје изразиле задоволство од одличните билатерални односи меѓу Македонија и Турција кои се потврдуваат со интензивната политичка соработка и честите средби меѓу високи функционери.
За средбата со началникот на ГШ на АРМ генерал-мајор Горанчо Котески грчките медиуми јавуваат дека Котески му се заблагодарил на Озел за несебичната и искрена поддршка и помош која Турција и ја дава на Армијата на Македонија и во напорите на земјата за целосна евроатланстка интеграција.
Од своја страна, Озел ја поздрави соработката меѓу вооружените сили на двете земји и истакна дека Турција ќе продолжи „безусловно и несебично“ да ја поддржува Македонија во нејзиниот пат кон членство во НАТО, објавуваат грчките гласила.