Претседателот на Република Македонија Ѓорге Иванов денеска се сретна со раководствата на универзитетите во Република Македонија.
На средбата присуствуваа ректорите на универзитетите „Св. Кирил и Методиј“ – Скопје, Велимир Стојковски, Југоисточна Европа Замир Дика, „Гоце Делчев“ – Штип Саша Митрев и проректорите на универзитетите „Климент Охридски“- Битола Сашо Атанасоски, „Свети Апостол Павле“ – Охрид Братислав Станковиќ и на Државниот универзитет во Тетово, Арбер Челику.
На средбата, како што соопшти Кабинетот на Претседателот, биле разгледани ставовите, забелешките, впечатоците и предлозите за унапредување на системот на студии, кои биле изнесени од студентите со највисок просек на студии од универзитетите во Република Македонија на шестте средби што претседателот Иванов ги оствари во периодот од март 2012 до април 2013 година, во рамки на својата програма и политика на дејност кон младите и студентите.
– Присутните на средбата ја поздравија иницијативата на претседателот Иванов и се заблагодарија за можноста да ги изнесат своите размислувања во однос на работата на универзитетите.
Претставниците на универзитетите констатираа дека предизвиците со кои се соочуваат високообразовните институции во својата работа треба да се решаваат на систематски начин, а решенијата што се нудат да бидат комплементарни, се вели во соопштението.
На средбата, се додава, претседателот Иванов порачал дека универзитетите и студентите треба да се прилагодат на новото време, кое, како што истакнал, бара постојано надоградување на знаењата и вештините.
– Иднината на државата ни зависи од кадрите што излегуваат од универзитетите, посочил претседателот Иванов.
Македонскиот претседател побарал универзитетите да нудат решенија согласно тенденциите во општеството и согласно потребите на пазарот на трудот. Претседателот Иванов и неговите соговорници се согласија дека ваквиот тип средби треба да продолжи, со цел изнесените сугестии и идеи да добијат своја соодветна примена.