Развој на квалитетно образование достапно на сите, образование кое ќе создава граѓани кои ќе размислуваат логички и критички и ќе донесуваат заклучоци базирани на факти и анализи, подобрување на оценките не меѓународните тестирање, образован процес по чие завршување младите ќе можат да се вклучат на пазарот на труд се приоритети во идното работење на Министерството за образование и наука.
-Верувам во еднаквоста. И моја лична определба е секое девојче и момче, низ образовниот систем, да се изгради во личност која ги почитува и негува граѓанските права, толеранцијата и различностите. Како заедница, како Влада, како министерство и како министерка се заложувам за воспитување и образување во духот на мултикултурализмот и создавање на кадар оспособен да одговори на побарувачката на пазарот на трудот, рече на денешната прес-конференција министерката за образование и наука Мила Царовска.
Еден од приоритетите на МОН, потенцира таа, ќе биде и подобрувањето на оценките на меѓународните тестирања.
-Секој од нас и јас како министерка сакам нашите деца да бидат на исто рамниште на знаења и способности со најдобрите. Тоа ќе го достигнеме преку образовна реформа базирана врз детална анализа на резултатите од меѓународните тестирања. Само со заеднички заложби на Министерството, училиштата, наставниците и родителите, резултатите од тестирањата ќе станат наша гордост, нагласи Царовска.
Таа додаде дека создавање мотивиран наставен кадар и враќање на достоинството на професијата наставник, како една од најважните алки во пренесувањето на знаењето, е меѓу приоритетите, и затоа ќе се вложува во кариерниот развој и унапредувањето на наставниците како и во соодветно вреднување на нивниот труд.
-МОН интензивно ќе работи и на јакнење на стручните училишта, со цел секој ученик по излегувањето од стручно училиште да може без проблеми да се вклучи во работниот процес, обезбедувајќи си добро платена работа и сигурна иднина, рече министерката за образование и наука.
Инвестициите во подобрувањето на условите за учење, потенцира, ќе се прават плански и паралелно со изградбата на нови училишта, ќе се одржуваат постоечките, а нема да бидат заборавени ниту студентските домови, кои треба да бидат пристојно место за живеење на студентите.
-Младите се наш многу важен фактор во носењето на сите политики поврзани со школувањето и подобрувањето на младинскиот стандард. Очекувам нивна активна вклученост, иницијативи, идеи и поддршка, рече министерката за образование Царовска.