На снимки од Неготино објавени на социјалните мрежи се гледа како Тимјаничка Река во градот е сериозно надојдена, а водата минува на само половина метар под мостовите. Реката го има исполнето основното корито, а во неа и натаму директно се слева вода од улиците, по обилниот дожд.
По врнежите од дожд во целата земја, според последните информации на УХМР, водостојот на поголемите реки е стабилен и се очекува да расте, но нема опасност од излевање.
„За време на викендот повторно се очекуваат локални поројни врнежи од дожд, на места доста интензивни, во вид на невреме и проследени со ветер, грмежи и град, прогнозираат од УХМР. Ваквите процеси можат да предизвикаат појави на течење и слевање на вода низ градските улици поради неможноста за одведување на водата во толку краток временски интервал. Исто така, поради очекуваниот интензивен дожд локално на некои места, можно е брзо зголемување на
водостојот на помалите реки и суводолиците, каде се препорачува внимателно движење,“ велат од УХМР.