Во пресрет на велигденските празници, Општина Штип и ОО на Црвен крст-Штип обезбедија 50 хуманитарни пакети за членовите на здружението на стечајци и технолошки вишок „УНИТ-Штип“.
Дел од пакетите лично им ги врачи градоначалникот на општина Штип, Илчо Захариев.
„Денеска заедно со Црвениот крст на Македонија донираме на група што вие ја определивте, најсиромашни, по еден пакет хуманитарна помош. Оваа помош нема да биде последна, значи по секој повод и настан кога ќе можеме тоа да го направиме, ќе го направиме за да добијат сите они што се на списокот кои вие го имате . Ќе се потрудиме во иднина да ги згрижиме сите оние што се работоспособни и на тој начин да ви ја вратиме вербата во животот“, изјави Илчо Захариев пред насобраните стечајци.
Претседателот на здружението на стечајци и технолошки вишок „УНИТ- Штип“, Кемаладин Арсланов, упати благодарност до градоначалникот и до ОО на Црвен крст- Штип за укажаната помош кон оваа ранлива категорија, која во претходните четири години беше сосема заборавена од локалните власти.
„Пред изборите ние остваривме средба со градоначалникот и од него добивме ветување дека ќе ни помага во секој случај и ете денес таа помош се оствари. Мислам дека и понатаму ќе имаме добра соработка со градоначалникот и ќе ни помага за сите позначајни настани“, изјави претседателот на „УНИТ-Штип.
„Овој пакет многу ни значи. Ние стечајците сме без работа многу години и сега сме доведени во состојба да мораме да чекаме вака некој да ни даде некаква помош“, изјави стечајката Јованка Ѓоргиева.
Во предизборието стечајците доставија барање за ослободување од давачките за вода и за комуналии до градоначалникот на општина Штип, Илчо Захариев, кој во тој момент беше кандидат за градоначалник. Ваквото барање на стечајците се уште не е разгледано од страна на градоначалникот, но тие се надеваат дека во блиска иднина ќе добијат позитивен одговор.
