Во тек е маршот на Алијанса за Албанците и на Алтернатива по скопските улици, кои сметаат дека на последните парламентарни избори „сериозно се оштетени демократијата и начинот на изразување на слободната волја на албанскиот граѓанин“.
Маршот започна во 19 часот од паркот Чаир во Скопје, а насобраните симпатизери и членови на двете партии ќе поминат пред Владата и маршот ќе го завршат пред канцелариите на Делегацијата на Европската Унија.
Забележливо е дека на маршот не се држи потребната дистанца, а маски за заштита од коронавирусот носат водачите и организаторите, но не и сите присутни.
Присутните на протестот веат албански, американски знамиња и знамето на Европската унија.
– Како знак на револт за потиснување на највозвишеното право на слободното гласање, овој марш – токму пред седиштето на Делегацијата на Европската Унија во Скопје – ќе испрати јасна порака дека една држава којашто ги започнува преговорите за членство во ЕУ не смее да дозволи дел од нејзините граѓани да бидат лишени од правото да избираат и да бидат избрани, што е основното човеково и политичко право во ЕУ, изјави вчера на прес-конференција портпаролката на Централниот штаб на коалицијата, Нурџан Асановска.
Симболи на маршот, посочи таа, ќе бидат националните симболи и симболите на нашите западни сојузници, а слоганите ќе се однесуваат на заштита на демократијата, укажувајќи дека секој друг симбол и кој било друг повик што искажува фобија, омраза или навреда за било кого, е против целта на овој марш.