На трибината во општина Центар, синоќа граѓаните имаа можност да разговараат со претседателот на СДСМ Зоран Заев, ко-носителката Мила Царовска, кандидатот за пратеник Горан Мисовски и носителот на листата во Изборната единица 1 Никола Димитров.
Димитров презентираше дел од конкретните мерки од програмата на коалицијата „Можеме“, а се однесуваат токму на решавање на долгогодишниот проблем со квалитетот на воздухот како што се многу поригорозна контрола на индустријата и во однос на казни кои треба да се зголемат трикратно и во однос на организација, систем и број на еко-инспектори. Предвидено е, нагласи тој, во секоја општина да има комунална служба којашто ќе работи 24 часа. Дронско набљудување на диви депонии, палење на отпад и сл.
– Шеесет илјади домаќинства ќе добијат бесплатни еко-инвертори за да се замени греењето на дрва, додека пак 100 000 000 евра се предвидени како субвенции за бизнис секторот во однос на нивните филтри, но субвенции ќе има и за домаќинствата, рече Димитров, уште еднаш потсетувајќи дека токму оваа област ќе биде многу важно прашање за пристапните преговори со ЕУ каде ќе има конкретни рокови, но и финансиска поддршка за овие проекти предвидени во програмата на „Можеме“.
Димитров од граѓанската трибина упати порака дека бројот 3 е бројот што ја носи нашата држава напред на овие избори.