Екипи на Единица за брзо распоредување интервенираа во ресторанот каде беше затекнат лидерот на ВМРО-ДПМНЕ, Христијан Мицкоски. “А1он” дознава дека тие интервенираат бидејќи се бришеле снимки од надзорни камери на кои се гледа дека угостителскиот објект работел, а внатре бил Мицкоски.
Пред ресторанот освен екипи на ЕБР и натаму се присутни и инспекторите на Пазарниот инспекторат, како и началникот на СВР Скопје, Ристе Ставревски.
Претходно, инспектори на Пазарниот инспекторат беа спречени да извршат надзор во затворениот дел на угостителскиот објект “Винарија” на Боемска улица, по што, два ипол часа останале пред објектот.
Додека инсистирале да направат увид, затекнале како политичар излегува од објектот. Ова за “А1он” го потврди инспекторката Мери Продановска, која кажа дека станува збор за лидер на политичка партија. “А1он” веќе објави дека станува збор за Христијан Мицкоски.