Вчерашното ад хок ставање на дневен ред на одлука за доделување на лиценцата на затворената А1 од страна на претседателот на советот за радиодифузија, Зоран Трајчевски, ги збуни и членовите на советот. Без да образложува, претседателот предложил, а тој и уште седуммина поставени во советот од владеачката ВМРО-ДПМНЕ без дискусија дигнале два прста, а другите седум поставени од СДСМ, ДУИ и ЗНМ биле против. Либертас дознава дека доделувањето на одземената лиценца на А1 е од две причини.
Прво, власта да си обезбеди уште една телевизија која е веќе под нивна контрола, но има лиценца само за сателитска. Нашиот извор тврди дека во прашање е тв Алфа која од пред половина година од тогашниот сопственик, бизнисменот Штерио Наков, наводно за 150.000 евра ја купи српскиот тајкун Јевросимовиќ.
Трансакцијата никаде ја нема, но во централниот регистар сменета е сопственоста, а во јавноста веќе нема дилема дека Алфа е телевизија на ВМРО ДПМНЕ, а бизнисменот Јевросимовиќ е само покритие.
Сега со доделување на лиценцата од А1 на Алфа, телевизијата нема да биде само сателитска туку како и Сител и Канал 5, ќе стане телевизија под целосна контрола на власта.
Втората причина за брзањето за давањето на лиценцата на А1 е заради дигитализацијата.
Операторот ОНЕ има обврска да ја спроведе, но телевизиите реагираат на висината што треба да им ја платат, а операторот не може со постоечките телевизии да се покрие.
Од тие причини слободната лиценца од А1 ќе и се даде на Алфа. Операторот ќе има уште еден муштерија и со тоа ќе ја намали сумата што телевизиите ќе требе да ја платат за дигитализацијата.