Гостиварското муфтивство на Исламската верска заедница по десетти пат ќе го одбележи денот на раѓањето на пророкот Мухамед.
Организациониот одбор на манифестицијата денеска на прес-конференција информира за активностите поврзани со овој значаен датум за муслиманите.
– Јубилејната десетта манифистација, исто како и претходните, има за цел да се одбележат животот и делата на пророкот Мухамед. Централната прослава ќе биде во спортската сала „Младост“ каде ќе биде организиран голем концерт со духовна музика и поезија. Очекуваме гости од повеќе балкански земји кои го најавија своето присуство, рече Ирсаљ Јакупи од Организациониот одбор.
Годинава, по повод денот на раѓањето на пророкот Мухамед ќе бидат организирани и ликовна колонија, изложба и промоција на книга.
Мухамед е роден на 20 април во 570-та година во Мека и е последниот од пророците кои ги пренесувале Божјите закони. Тој првпат започнал да проповеда во 607-та година. Се смета дека Божјата книга Куранот е буквален запис на пораките кои Господ, преку архангел Гаврил, му ги испратил на Мухамед.
