Зијадин Села од ДПА е градоначалник на Струга. По долга, мачна и жестока расправа, резултат од гласањето во Државната изборна комисија е дека прифатените приговори од ВМРО-ДПМНЕ не влијаат на конечниот резултат.
Државната изборна комисија ги отвори и гласачките материјали од избирачките места 1882, 1885 и 1911 од општина Струга. На изборното место 1911 пронајдено е гласачко ливче од изборното место 1885, при што е констатиран фалсификат.
Исто така, фалсификувано гласачко ливче е пронајдено и во изборното место 1882.
На едното од сомнителните фалсификувани гласачки ливчиња заокружен е кандидатот за градоначалник од редовите на ВМРО-ДПМНЕ, додека на другото каднидатот на ДПА.
Дел од членовите на ДИК остро реагираа, констатирајќи дека со ова се докажува дека имало „бугарски воз“ или како што го нарекоа фатен е „дивиот зајак“. Ова велат се случувало и во други избирачки места во Република Македонија.
ДИК ги разгледа и ги отфрли и приговорите на СДСМ. Сега на потег е Управниот суд, чија одлука по жалбите е конечна.