Во Њујорк денеска почнуваат средбите на посредникот во разговорите за спорот за името, амбасадорот Метју Нимиц и претставниците на Македонија и на Грција, Зоран Јолевски и Адамантиос Василакис.
За денеска рано попладне, според локално време, е предвидена одделната средба на Јолевски и Нимиц, кој денеска треба да се сретне и со грчкиот дипломат Василакис.
По консултациите со властите во Македонија и во Грција, утре наутро, во седиштето на Обединетите нации во Њујорк, ќе се одржи и заедничката средба на тројцата учесници во разговорите, по што е предвидено обраќање на Нимиц за претставниците на медиумите.
При закажувањето на оваа рунда средби, Обединетите нации најавија дека нивна цел е да се продолжат разговорите за да се изнајде взаемно прифатливо решение за прашањето за ‘името’.
Последната рунда разговори се одржа на 29 и 30 јануари кога двете страни изразија подготвеност за брза нова средба.