По набавката на соодветен материјал во Словенија почнува масовно производство на заштитни маски, јави дописникот на МИА од Љубљана.
Материјалот пристигна во петокот, а потребните заштитни маски веќе почнува да ги произведува компанијата Боксмарк од градот Кидричево, објави СТА.
Според плановите неделно треба да се произведуваат од 40.000 до 45.000 маски, односно од 5.000 до 8.000 на ден.
Маските ќе ги произведуваат 132 шивачи, кои доброволно се пријавиле за работа по повикот на државата, бидејќи на земјата и недостасува заштитна опрема во борбата со коронавирусот.
Надлежните информираат дека откако ќе се задоволат потребите на медицинските и службените лица, заштитните маски ќе бидат дистрибуирани и во аптеките на слободна продажба.