Поголем број од граѓаните нема да ги третираат изборите како легитимни, смета претседателот Стево Пендаровски за евентуалното одржување на превремените парламентари избори на 12 април.
Тој вели дека неговиот став е дека изборите треба да се одложат, но утре, на лидерската средба, Пендаровски рече дека ќе биде само домаќин.
„Собранието е во постојано заседание, вели нашиот Устав. Не дај Боже војна, немаме Собрание? На Советот за безбедност и претседателот на Собранието беше тука. Значи ако Собрание нема, како има претседател на Собрание? Јас тврдам дека и политички и правно е можно, ако затреба и ако не дај Боже има ситуација, но и ако согласат политичките партии и пратениците, во законски потребните мнозинства да ја поништат својата претходна одлука и се надевам дека утре во 12 часот, каде јас сум само добар домаќин, лидерите ќе решат да ги одложат изборите бидејќи во оваа ситуација не е возможно да организирате избори кои ќе бидат третирани како легитимни од поголем број на населението“, вели Пендаровски.
Уставниот суд во 2015 одлучи дека е противуставно да се распушта на Собранието и повторно да се собира, а Пендаровски рече дека одлуката има голем број правни недостатоци.
„Таа одлука на Уставниот суд има голем број правни фалинки. Меѓутоа не одам понатаму од тоа. Мојот став е дека може да се одложат изборите иако има одлука за распуштање на Собранието“, додаде Пендаровски.