На Клиниката за инфективни болести за коронавирус се тестираат седуммина нови пациенти меѓу кои и две бремени жени, извести министерот за здравство Венко Филипче. Петмина од нив се вратиле во Македонија од Швајцарија, Австрија и Германија, а симптомите им се јавиле неколку дена по враќањето. Двете бремени жени се од Дебар.
„Станува збор за пациенти од Штип, Куманово, Тетово, Кичево и Охрид. Дел од нив престојувале во Швајцарија, Аврстрија и Германија, тоа се пациентите од Штип, Куманово, Тетово и Кичево. После неколку дена од враќањето развиле висока температура, а сега се во одделите за изолација. Нивните резултати ќе бидат готови во текот на денот. Од Охрид еден пациент и две родилки кои вчера се донесени од Дебар. Едната е во болницата во Охрид, другата е во Скопје, двете се во оддел за изолација. Во стабилна состојба се и не се непосредно пред породување. Ги донесовме за да се направат тестовите и да бидат спремни за породувањето“, рече министерот Филипче.
Резултатите од тестовите се очекуваат во текот на денот, а новозаразени пациенти денес нема.
Сите хоспитализирани пациенти се со лесна клиничка слика вклучувајќи го и 15 годишниот пациент, а кај пациентката од Дебар која е на респираторни машини забележливо е значајно подобрување на параметрите, но состојбата се уште и е непредвидлива.