Лидерот на ДУИ, Али Ахмети на рочиштето за „Монструм“ рече дека се познава со обвинетиот Фејзи Азири од 2002 или 2003 година, одговарајќи на прашање од родителот Горан Наќевски, чиј син беше застрелан.
„Јас кога го запознав беше добар човек. Тој ми има кажано дека чува стока“, рече Ахмети на прашање од адвокатот Насер Рауфи.
Обвинителката Фатиме Фетаи цитираше разговор меѓу Ахмети и соговорник, воден два дена по настанот, каде според Фетаи, Ахмети рекол дека убиените биле буквално стрелани. Ахмети рече дека не знаел дали Бујар Османи бил кај загрозениот сведок, Хаки Азири.
„Тоа сум го кажал бидејќи информациите сум ги имал од институциите, бидејќи тие не биле само убиени, туку масакрирани“, рече Ахмети запрашан од каде знаел дека убиените биле „буквално стрелани“, како што кажал на соговорник два дена по настанот.
Родителот Горан Наќевски цитираше разговор од Ахмети каде тој рекол “Ова е голем срам за Албанците”. Родителот на убиеното момче кај Смилковско езеро, го запраша дали стои на истиот став.
„Не мислам дека Албанец кој би го правел овој криминал. На сите сум им кажал дека ако е извршено од страна на Албанците, јас со плукање ќе ги казнам”, рече Ахмети.
И останатите прашања на Фетаи се темелеа на нелегално прислушкуваните разговори.
„Сигурно тоа не би можело е неоснована информација, и во медиумите во тоа време имаше осомничени. Но, што било важно за биолошкиот материјал, секогаш сум се повикувал за да не се обвинува никој без докази”, рече Ахмети запрашан од каде знаел дела биолошкиот материјал не се совпаѓа со осомничените, освен со првиот и вториот осомничен.
Во разговорите се слушало и како Блерим Беџети и Али Ахмети зборувале за „Монструм”, а лидерот на ДУИ рекол „Се трудиме да го менаџираме”. Фетаи на судењето го праша што значи тоа менаџирање кое го споменувал Ахмети.
„Треба да се зборува со часови за тоа како била менаџирана ситуацијата. На крајот за нас беше вистината за настанот. Дилемите кои ги имавме ги изразувавме секогаш и се направи работна група”, рече Ахмети.
Фетаи цитираше и други разговори. Имало и друг запис од телефонски разговор меѓу ексминистерот Џелал Бајрами и Ахмети, нецел месец по убиството кај Смилковско езеро.
„Многу би се загршило работа, ако на тие им се направело тестирање, на тие двајца што се во Косово“, рекол Ахмети во разговорот.
„Не знам сум заборавил, не знам конкретно за кого се однесува. Но, ако се однесуваше на обвинетите и ако нема материјални докази, сигурно, тоа сум го кажал за нив”, рече Ахмети за разговорите.
За Фетаи беше дилема како Ахмети знаел за прво и второ обвинетиот дека се во Косово, кога тие не биле фатени, а Ахмети одговори “Тоа го знаеше цела јавност”.
Прашања до адвокатот имаше и Дафинка Ивановска, адвокатка на оштетените. Таа го праша за работната група, која претходно ја спомена Ахмети.
„Нашата цел беше да се повтори судењето, бидејќи не беа земени сите докази во предвид. И на крај оваа група се формираше, а како резултат на оваа група, еве денес се повторува судењето”, рече Ахмети.
Ахмети беше запрашан кои се точните и конкретни причини за формирање на оваа работна група, кои требаше да ги наведе, требало и сакале судењето да се повтори.
„Јас ви реков дека материјалните докази требаше да бидат поуверливи. Судењето кое претходно се одвиваше оставаше простор дека не било како што треба, односно недокажано. И тука е прашањето како да се менаџира тоа. Сме имале голема одговорност, бидејќи од еден трагичен настан можело да се случи друг”, рече Ахмети.
Запрашан од адвокатката Ивановска, „Дали има преземени дејствија за да се повтори постапката и кон кого?”, Ахмети рече „Цел беше да покренеме иницијатива, а не конкретна акција. Сум предложил органите кои се надлежни да го реализираат тоа, односно да одлучат дали ќе се повтори или не”.
Во разговор со Сафет Незири, лидерот на ДУИ, Ахмети барал информации за обвинетите и семејствата на убиените деца, се слушало од прислушкуваните разговори. Ахмети беше прашан дали има заклучок, дали обвинетите се виновни, а тој рече „Јас сум претседател на партија, а не директор на театар. Јас имам одговорност за да се погрижиме..“.
Родителот Горан Наќевски го запраша Ахмети дали зборувале за бомбите за “Монструм”, со доскорешниот премиер, Зоран Заев, по што тој негираше.
„Јас сум разговарал со многу луѓе, не само по телефон, односно, со луѓе кои не се во транскриптите. За мене беше голем и трагичен настан. Сигурно сум разговарал со многу луѓе, но не во кафана. Јас сум институционална личност со одговорност и ме интересираше само вистината”, рече Ахмети.