Министерката за правда Рената Тренеска – Дескоска не учествува на вечерашниот марш, „Чекориме за правда“ што го организира СДСМ.
Во соопштението на Министерството се вели дека таа се решила на овој чекор поради принципот на „немешање во судската власт“.
„Дозволете да ве информираме дека ги поддржуваме граѓаните во нивните барања за враќање на довербата во правосудството, но заради почитување на принципите на немешање во судската власт, Ве информираме дека министерката за правда нема да учествува на денешниот марш“, стои во соопштението.
На маршот учествува целото раководство на СДСМ предводено од лидерот Зоран Заев.
Како што најавија од партијата, маршот се одржува со заложба за градење силно, независно и професионално обвинителство и судство. Токму затоа, како што рекоа од партијата, маршот завршува пред судот, што би претставувало симболика за правни разрешници и крај на криминалните дејствија во нашата држава.
Маршот следува откако вчера попладне пратениците го изгласаа Законот за јавно обвинителство, како и Законот за Совет на јавни обвинители.
Со новодонесениот Закон за јавното обвинителство, сметаат од Министерството за правда, се овозможува продолжување на сите започнати постапки, воведување гаранции за независноста на јавното обвинителство и зголемена ефикасност на Основното јавно обвинителство за гонење на организиран криминал и корупција.
„Создадовме гаранција за спречување на манипулацијата со АКМИС системот кој во минатото се злоупотребуваше за избор на подобни судии кои ќе работат на конкретни предмети. Со новиот Закон за управување со движењето на предметите во судовите и Законот за судовите предвидовме основ за разрешување на судии и претседател на суд ако предметите не се доделуваат по случаен избор преку АКМИС. Создадовме правен основ и за сличен систем за распределба на предмети по случаен избор и во рамки на Јавното обвинителство. Тргнувајќи од сето ова, очекуваме сите институции во рамки на правосудството да ја имаат предвид својата улога во градењето на систем на владеење на правото, почитување на човековите права и напредувањето на патот на евроинтеграцијата. Судиите и обвинителите, членовите на Судскиот совет и Советот на јавни обвинители се сега на потег, се вели во соопштението од Министерството за правда.