Вечерва на плоштадот Магнолија, во еуфорична атмосфера, „Сојузот за иднината” го одржа својот предизборен митинг во Битола.
На митингот најпрво беа промовирани кандидатите за советници и носителот на листата Васко Ковачевски. Тој прв се обрати пред битолчани и вети дека како идна власт во Советот нема да бидат како сегашната – неми послушници и гласачка машина, и дека ќе работат за доброто на народот.
Прет присутните зборуваа и Горан Милевски од ЛДП, претседателот на НСДП, Тито Петковски и лидерот на ВМРО-Народна, Љубчо Георгиевски.
Кандидатот за градоначалник на Битола од СДСМ и коалицијата, Менде Диневски, зборуваше дека има тим од чесни и домаќини луѓе, со кои заедно Битола ќе ја направат поубаво место за живеење и на битолчани им вети европска Битола.
Во својот говор го повика и актуелниот кандидат и градоначалник Владимир Талески на дуел за да ги расчистат сите лаги што биле кажани низ медиумите.
Последен пред битолчани се обрати претседателот на СДСМ Бранко Црвенковски, кој најави дека победата ќе започне од Битола и го промовираше Менде Диневски како иден градоначалник на Градот на конзулите.
