Во Обвинителството за организиран криминал и корупција бил поканет и Бојан Јовановски заедно со неговиот татко Миле Јовановски за да направат увид во доказите поврзани со истрагата која се води за Меѓународниот сојуз.
Тие не се одзвале на поканата, а наместо Бојан Јовановски увид правел неговиот адвокат Сашо Дуковски
„Јас правев увид во доказите, наместо мојот клиент“, потврди Дуковски за А1он, но не кажа зошто Јовановски не дошол на увидот како што правеше претходно.
Вчера увид во доказите вршеле заменик-претседателката на Меѓународниот Сојуз – Јасна Мандиќ и асистентката на Јовановски – Кристина Блажевска, потвтрдуваат од Обвинителството за А1он.
„Бојан Јовановски и Миле Јовановски беа повикани да направат увид во доказите за да се подготват да дадат исказ за случајот поврзан со Меѓународниот сојуз“, велат од Обвинителството за А1он.
Моментално увид во доказите врши Фросина Ременски.
Таа е осомничена дека помагала во извршувањето на делата „Измама“ и „Перење пари“ за кои се осомничени пет физички лица, и тоа, заменик-претседателката на Меѓународниот Сојуз – Јасна Мандиќ, таткото на Бојан Јовановски – Миле Јовановски, асистентката на Јовановски – Кристина Блажевска како и самиот Бојан Јовановски.
Според истрагата, во периодот од јули 2017 година до април 2018 година, првоосомничениот како претседател на осомниченото правно лице, искористувајќи документи од правното лице, довел и одржувал во заблуда двајца управители на две друштва за градежништво.