Неформалниот работен појадок на шефовите на дипломатиите од ЕУ и од Северна Македонија и Албанија, што се одржа во понеделникот во Брисел, по иницијатива на Грција, според грчки дипломатски извори поминал во многу подобра клима од претходни неформални состаноци со европски министри во рамките на грчките напори да им се помогне на двете земји да добијат датум, а како особено важен факт го посочуваат учеството на 20 министри, јави дописничката на МИА од Атина.
Иницијативата на Грција е во рамките на грчката политика заснована на солунската агенда според која Атина цврсто ја поддржува европската перспектива на земјите од регионот.
Грчки дипломатски извори брифираат дека Атина ќе направи сѐ што може за да им помогне на двете земји, коментираат дека Грција сака на север да има стабилни соседи со европска иднина, а кога ќе созреат условите Северна Македонија и Албанија може да бидат најдобри сојузници на Грција.
Истите извори, како што јави дописничката на МИА од Атина, паралелно објаснуваат дека Грција е против раздвојување на кандидатурите, односно дека Северна Македонија и Албанија треба заедно, во пакет да добијат датум за почеток на пристапни преговори со унијата и истакнуваат дека пристапниот процес во ЕУ, паралелно е и процес на внатрешни реформи за самите земји.