Израелскиот јавен обвинител официјално поднесе обвинение против премиерот Бенјамин Нетанјаху, кој сега има рок од 30 дена да поднесе жалба барајќи имунитет.
Обвинението е објавено на 77 страници, според кое израелскиот премиер се товари за мито, кршење на довербата и измама.
Во обвинението се наведува дека судењето на израелскиот премиер ќе биде во судот во Ерусалим. Исто така, има 333 сведоци што државниот обвинител би можел да ги повика.
Нетанјаху (70) ги отфрла обвиненијата, како и повикот да поднесе оставка.
„Кога имате вистински случај не ви се потребни 333 сведоци, а кога не постои дури ни 333 сведоци нема да помогнат“, напиша Нетанјаху на Твитер.
Доколку биде осуден за примање мито му се заканува затворска казна до 10 години, а за измама и кршење на довербата максимална казна од три години затвор.