Утре во кривичниот суд во Скопје треба да продолжи судењето за предметот „Монструм“ на СЈО за петкратното убиство кај Смилковско Езеро на 12 април 2012 година. Јавниот обвинител Љубомир Јовески според информациите на „А1он“ ги овластил обвинителите Гаврил Буевски и Фатиме Фетаи да го застапуваат случајот.
На утрешното рочиште треба да бидат пуштени бомбите во судницата. Петкратното убиство се случи на 12 април 2012 година, кога беа убиени момчињата Кире Тричковски, Филип Славковски, Цветанчо Ацковски, Александар Наќевски и рибарот Борче Стефановски.
Во претходна постапка за случајот на доживотен затвор беа осудени Алил Демири, Африм и Агим Исмаиловиќ, Езим и Хаки Азири и Сами Љута.
Врховниот суд во декември 2017 година ја укина пресудата и ги ослободи од притвор осудените Агим Исмаиловиќ, Хаќи Азири, Сами Љута и Фејзи Азири, и им определи мерки на претпазливост.
По укинувањето на пресудите, случајот „Монструм“ го презеде СЈО и предметот беше вратен на повторно судење.