Британскиот премиер Дејвид Камерон изјави во Лондон дека нема намера да го менува министерот за финансии Џорџ Озборн, поради намалувањето на кредитниот рејтинг на Велика Британија.
– Озборн изврши голема работа во овие многу тешки времиња за економијата, рече Камерон.
Изјавата на британскиот премиер доаѓа по одлуката на најголемата светска агенција за определување кредитен рејтинг „Мудис“, да го намали рејтингот на британската држава од досегашниот ААА на Аа1.
Експерти во финанскиот центар Сити во Лондон сметаат дека решението на „Мудис“ е понижувачки момент за земјата, а пред се за министерот за финансии Озборн и за неговата економска политика.
Озборн претходно тврдеше дека токму тоа што Велика Британија го задржува својот рејтинг е најсилната потврда за исправноста на економската програма на Владата.
Опозиционите лабуристи засега не бараат оставка од министерот Озборн, но го засилија притисокот за промена на економскиот курс на владината коалиција и олабавување на острите мерки за штедење и скратување на буџетското трошење, за сметка на создавањето клима за економски раст.
Британската економија е веќе долго време во стагнација, а на почетокот од оваа година таа одново се соочува со можноста да западне во рецесија, по трет пат од 2008 година.