Жителите од поплавените населени места во општина Струмица ги чека уште една долга ноќ во битка со водената стихија. Најзагрозени се селата Муртино, Сачево, Просениково, Дабиле, каде сè е поплавено, и домовите и пластениците засадени со раноградинарски култури, под вода се дел и од автомобилите и земјоделската механизација. Според најстарите жители, вакви поплави во овој регион не се паметат од 1962 година.
Жителите на овој крај претрпеа огромни штети. Движењето низ селата е невозможно, единствено само со чамци. Надојдените води као реки течат низ селата и носат се пред себе. Во текот на денешниот ден општина Струмица ги презеде и сè уште ги презема сите мерки за справување со поплавите. Се евакуираа жители кои не можеа да излезат од своите домови, а за жителите од најзагрозените села Муртино, Сачево, Просениково и Дабиле, кои немаат услови да престојуваат во своите домови, општината организира сместување во хотелите – рече Заев, кој во текот на денот имаше средби со жителите од поплавените села.