Директорот на Дирекцијата за заштита на личните податоци Горан Трајковски во петокот доставил барање за престанок на функцијата директор на Дирекцијата за заштита на личните податоци до Собранието. Во барањето, Трајковски вели дека оставката е од лични причини.
„Во изминатиот период раководејќи со Дирекцијата за заштита на лични податоци, силно помогнат од вработените, Собранието и соодветните владини институции успеавме да покажеме и докажеме дека слабостите се препознаени и истите согласно најдобрите европски практики во областа на заштитата на личните податоци знаеме и можеме да го поставиме согласно европските вредности“, се вели во оставката на Трајковски.
Тој во барањето посочува и дека неговата работа во Дирекцијата била предмет на редовните годишни извештаи до Собранието, каде низ комисиските и пленарни дискусии била поздравена работата на ДЗЛП. Траковски го повика Собранието што поскоро да го донесе новиот Закон за заштита на личните податоци кој е целосно усогласен со новата општа регулатива за заштита на личните податоци на ЕУ. Трајковски беше назначен за директор на ДЗЛП во 2016 година, а претходно скоро десет години се наоѓаше на директорската функција во Управата за јавните приходи.