Државниот пазарен инспекторат ќе проверува дали стои ознаката „гарантирана цена“ и дали се почитуваат останатите одредби од одликите кои се однесуваат на трговците на мало и на трговците на големо. ДПИ известува и дека зголемување на цените на основните прехрамбени производи нема да има, а пазарниот инспекторат ќе продолжи да постапува по веќе донесените одлуки на Владата за намалување на цените.
„Граѓаните да бидат спокојни! Цените на основните прехрамбени производи нема да се зголемат, може само дополнително да се намалат! Пазарниот инспекторат ќе продолжи да постапува по одлуките за намалување на цените кои се веќе донесени! Оној што нема да ги почитува одлуките ќе биде казнет без селекција! Граѓаните се на прво место, а ние сме тука за да го штитиме нивниот стандард!“ – изјави директорот на ДПИ, Горан Трајковски.