Истрага што ја спровел сервисот на арапски јазик на Би-Би-Си доведе до пронаоѓање видео снимки и фотографии од можни воени злосторства извршени во Либија.
Материјалот е пронајден на социјалните мрежи Фејсбук и Јутјуб, каде долг време бил споделуван, а на снимките може да се види како „борци на самопрогласената и меѓународно непризнаена Либиска национална армија (ЛНА) скрнават тела на борци и цивили“, информира Би-Би-Си.
Медиумот потсетува дека според меѓународните закони, скрнавењето тела и објавување фотографии од такви призори на Интернет е воено злосторство.
Наведувајќи дека некои од материјалите на социјалните мрежи биле повеќе од две години и имале преку 10.000 прегледи, британскиот медиум во описот на својот видео прилог, објавен со текстот, наведува дека еден од припадниците на „елитните единици“ на ЛНА се фалел со убивање и потоа масакрирање на тела на команданти на џихадисти со објавување снимки на својот профил на Фејсбук.
Би-Би-Си лицето Шериф ал Маргани го поврзува со ЛНА врз основа на неговата униформа и една видео снимка во која се ракува со лидерот на самопрогласената администрација Калифа Хафтар.