Во Стразбур владее извесна претпазливост во однос на последниот развој на ситуацијата во Македонија по одлуката на опозициијата да не учествува на престојните локални избори, јавува дописникот на МИА од Стразбур.
Од Советот на Европа, најстарата паневропска организација, во која Македонија е членка од 1995 година, досега не успеавме да добиеме официјална реакција. Eден од аташеата за печат само ни објасни дека Советот на Европа сака да има појасен преглед на ситруацијата пред да се реагира официјално.
Слично е и со нејзиниот советодавен орган-Конгресот за локaлни и регионални власти, надлежен за следењето на локалната демократија во Европа. Делегација на Конгерсот имаше најавено предизборна посета на Македонија од 24 – 27 февруари, каде на лице место ќе требаше да се состане со претставници на централната и локалната власт, невладини организации, универзитетски работници и претставници на медиуми, за да се запознае со предизборната политичка и медиумска клима, пред да ја испрати делегацијата за следење на изборите на 24 март.
Андре Бушман, известувачката во Конгресот за локалната демократија за Македонија, откако беше запозната со одлуката на опозицијата да не учествува на локалните избори, за ДВ кратко коментираше дека „оваа одлука само го поништува позитивниот карактер на извештајот на Конгресот за локални и регионални власти“.
Имено, во октомври минатата година, Конгресот го усвои извештајот во кој покрај забелешките имаше и многу пофални зборови за локалната демократија и процесот на децентрализацијата во Македонија.
Деновиве група од 21 член, на Парламентарното Собрание на Советот на Европа(ПССЕ), кои доаѓаат од 17 земји членки, изразија загриженост „за функционирањето на демократските институции“ во Република Македонија. По одлуката на опозицијата да ги бојкотира локалните избори не е исклучено ПССЕ и воедно Советот на Европа да реагира во овај случај, како што реагираше во слична ситуација во Молдова или Албанија.