Во Центарот за дијабетес при ЈЗУ Универзитетска клиника за ендокринологија, дијабетес и метаболички болести, денеска ќе биде промовиран апарат (за фотографија на очно дно) за скрининг на дијабетична ретинопатија, донација од Интернационалната федерација за дијабетес (International Diabetes Federation – IDF).
Како што соопшти Клиниката за ендокринологија, донацијата е резултат на долгогодишната соработка на Националното здружение на ендокринолози и дијабетолози на Македонија и Македонската дијабетолошка асоцијација со Интернационалната федерација за дијабетес, чиј претседател проф. Нам Чо ќе присуствува на промоцијата на апаратот.
По предлог на Научното здружение на ендокринолози и дијабетолози на Македонија, апаратот се донира на Клиниката за ендокринологија, со обврска за повеќе од 1.500 прегледи годишно кои ќе бидат директно испратени до светската датабаза создадена од Интернационалната федерација за дијабетес.
-Со оглед на се поголемиот број на луѓе со дијабетес во Македонија, личната засегнатост на пациентите, како и финансискиот товар на државата во однос на третманот од компликациите од дијабетесот, скринингот за компликации е од особено значење. Од овој аспект, ваквата донација ќе има голема улога и ќе биде од огромно значење за скрининг и рана дијагноза на една од најпознатите микроваскуларни компликации од дијабетесот – дијабетична ретинопатија, наведуваат од Клиниката за ендокринологија.