Напаѓачот кој во петокот уби 50 луѓе и рани многу други во две џамии во Крајстчрч, Нов Зеланд дејствувал сам, но можеби имал поддршка, соопшти полицијата.
„Веруваме дека апсолутно имало само еден напаѓач кој е одговорен за ова“, изјави полицискиот комесар Мајк Буш. Тој додаде дека полицијата не ја отфрла можноста напаѓачот да имал поддршка од други луѓе и оти таквата претпоставка е многу важен дел од нивната истрага.
Австралиецот Брентон Тарант (28) беше обвинет за убиство во саботата, а судијата рече дека најверојатно ќе се соочи со повеќе обвиненија. Пред нападот, Тарант објавил на интернет антиимигрантски манифест од 74 страници, а преку камера монтирана на кацига тој во живо го пренел нападот.
Австралиската полиција изврши претрес во домот на Тарант со цел да дојде до некаков материјал што би може да ѝ помогне на полицијата на Нов Зеланд. Комесарот Буш изјави дека австралиската полиција не открила ништо што би ја загрозило јавноста.
На прес-конференција што се одржа во понеделникот, сопственикот на една продавница за оружје истакна дека тие му продале четири пушки и муниција на Брентон Харисон Тарант преку онлајн нарачка одобрена од полицијата.