Со задоволство можам да соопштам дека граѓаните на Република Македонија добија нов состав на Државната комисија за спречување на корупцијата, изјави во собранието потпретседателот на СДСМ и пратеник, Мухамед Зеќири.
„Добивме професионално, стручно, целосно независно и зајакнато тело за борба против корупцијата. Изборот на кандидатите беше направен преку најтранспарентниот процес досега. Во процесот на селекција, покрај условите за стручност, искуство и апсолутно никаква поврзаност со политички партии, кандидатите беа избрани преку јавни интервјуа, во кои покрај Комисијата за селекција, учествуваа и експерти, новинари, претставници на невладиниот сектор“, рече Зеќири.
Новиот Закон за борба против корупцијата, како што посочи, предвидува проширени надлежности на Антикорупциската комисија, како и зајакнати механизми кои ќе им овозможат поефикасна работа.
