Здружената опозиција попладнево организираше протестен марш со автомобили низ охридските улици и Граѓански парламент кој се одржа пред трговскиот центар „Трудбеник“.
Стотина автомобили со државни и партиски знамиња и вклучени сирени и цвирежи го „поздравија“ доаѓањето на премиерот Никола Груевски кој во Охрид присуствува на промоцијата на изборната програма на кандидатот за градоначалник на Охрид од редовите на ВМРО ДПМНЕ, д-р Никола Бакрачески.
На Граѓански парламент, со свое излагање против уништувањето на демократијата и апсолутистичкото владеење на актуелната власт се обрати актуелниот градоначалник на Охрид, Александар Петрески.
„Останува во наредниов краток период да се подготвиме, да бидеме спремни. Целиот овој труд многу не чини и вас и нас. Нашата машинерија е веќе тргната. Цело време работиме на подигање на рејтингот на партијата. Имаме силна коалиција. Имаме 10 илјади гласови повеќе од власта. Затоа Груевски бега од парламентарни избори.“ рече Петрески.
Пратеникот Митре Вељаноски истакна дека со земјата владеат неодговорни луѓе кои не го почитуваат ниту законот ниту уставниот поредок.
„Ова не е едноумие, туку мафијашко владеење. Ова е борба за уставниот поредок, демократијата и слободата во земјава.“ рече Вељаноски.