Владејачката демократска партија на албанскиот премиер Сали Бериша, ќе коалицира со партијата Движењето за социјалистичка интеграција на Илир Мета, јави дописникот на МИА од Тирана.
Ова јавно го соопшти Астрит Патози, координаторот на пратеничката група на ДП, додавајќи дека е се уште рано да се каже дали коалицијата ќе биде пред парламентарните избори закажани за 23 јуни или по изборите.
– Ние сме партија која ги почитува изборните договори, изјави Патози не оставајќи а да не спомене дека се сигурни во изборниот триумф и на овие избори, она што постојано го повтрува и неговиот партиски лидер, Бериша.
Патози ги коментираше и изјавите на премиерот Сали Бериша, за национално обединување на Албанците, оценувајќи при тоа дека не станува збор за примитивен и агресивен национализам, туку напротив „од нашите изјави нема закани за националистички бран“.
Според него обединувањето на Албанците во една држава е цел на идните мандати, а артикулацијата на тотално обединување на Албанците ја направил шефот на владејачкото мнозинство Бериша. По победата на изборите во 2005 година, немајќи мнозинство во Парламентот, демократите на Бериша формираа коалициска влада со партијата на Мета, со што за првпат Албанија доби деснолевичарска влада.
