„Жолтите елеци“ и натаму протестираат во неколку градови низ Франција, соопштија претставниците на ова движење. Ова е седма сабота по ред што се одржуваат протести против политиките на претседателот Емануел Макрон, а бројот на демонстранти денес беше значително помал од претходно.
Дел од претставниците на тоа движење кое почна без какви било политички и синдикални рамки, сметаат дека намалувањето на бројот на демонстранти е поврзано со Божик и Нова Година и најавуваат остро продолжување во јануари и покрај владините отстапки.
Претседателот на движењето, Бенјамин Коши изјавил дека демонстрации ќе има и во текот на новогодишната ноќ, за да се покаже дека мобилизацијата нема да биде прекината со почеткот на 2019 година, пренесе АФП.
Тој предупредил дека доколку не бидат зголемени отстапките на Макрон, кон крајот на јануари ќе следи општа мобилизација.