Украинскиот претседател Володимир Зеленски синоќа изјави дека земјата ќе склучи договори за поддршка на одбраната со балтичките и северноевропските земји следната недела.
„Работиме многу активно за да обезбедиме нашите одбранбени сили да добијат сè што им е потребно. Оружје – производство и снабдување, финансирање, обука – за секоја потреба, склучуваме нови договори со партнерите“, рече Зеленски.
Тој рече дека Украина и Германија ќе склучат „многу добри“ договори за инвестиции и производство на украинско оружје, како и дека Холандија работи на испорака на борбени авиони Ф-16, објави Укринформ.
– Велика Британија ги насочува профитите од замрзнатите руски средства, особено, кон вооружување и поправка на опрема за Украина. Сите овие милијарди долари ја зајакнуваат одбраната на нашата држава, го зајакнуваат нашиот народ, рече Зеленски.
Зеленски додаде дека Украина активно соработува со сите што можат да ги зајакнат санкциите против Русија, бидејќи, како што рече, е потребен притисок за да се принуди Русија да ја заврши војната.