Во ретко јавно несогласување меѓу украинските лидери, претседателот Володимир Зеленски го критикуваше градоначалникот на Киев дека не ја завршил добро работата организирајќи засолништа за да им помогне на граѓаните кои останале без струја и вода поради руските напади.
Како резултат на руските ракетни напади врз енергетската инфраструктура, властите отворија илјадници т.н „непобедливи“ центри во кои луѓето можат да се стоплат, да добијат вода, интернет и телефон.
„Имаше особено многу поплаки во Киев“
Зеленски во вчерашното вечерно обраќање сугерираше дека градоначалникот Виталиј Кличко и неговите соработници не направиле доволно.
„За жал, локалните власти не завршија добро во сите градови. Во Киев имаше особено многу поплаки… Најблаго кажано, треба да се работи повеќе“, рече претседателот.
„Ве молиме, обрнете внимание, на луѓето во Киев им треба поголема помош, многумина се без струја 20, 30 часа. Очекуваме квалитетна работа од градоначалникот“, додаде тој.
Зеленски ги критикуваше и оние кои, како што рече, лажеле во официјалните извештаи, но не прецизираше на што конкретно мисли. Досега се отворени повеќе од 4.000 центри.
Ова се необични изјави бидејќи Зеленски се обидуваше да остави впечаток на национално единство од почетокот на војната и обично ги пофалуваше другите функционери.
Кличко, 51-годишен поранешен боксер, беше избран за градоначалник на Киев во 2014 година. Неговата канцеларија сè уште не одговорила.