Во Бангкок денеска започна процесот за именување на крунскиот принц Маха Ваџиралонгкорн за нов крал на Тајланд.
Тајландскиот Парламент му испрати формална покана на принцот да ја преземе круната, која тој мора да ја прифати пред да може да седне на престолот.
Тој треба да го наследи неговиот татко, кралот Бумибол, кој почина на 13 октомври.
Во тајландската јавност се очекуваше веднаш по смрта на популарниот крал, неговиот син да го наследи на престолот, но пред повеќе од еден месец принцот објави дека побарал неговото крунисување да биде одложено, најмалку за една година.
Ваквото барање беше објаснето со желбата на ожалостениот принц Тајланѓаните да имаат доволно време за тагување по починатиот крал, пред тој да дојде на престолот.
Тајландски правни експерти предупредуваат дека ваквата одлука на принцот создава „уставна неизвесност“.
Во овој период, улогата на регент ја извршува пораншениот тајландски премиер Прем Тинсуланонда.
Претседателот на Парламентот пред неколку дена изјави дека неделава ќе се сретне со принцот и формално ќе му ја предаде поканата за да стане нов тајландски крал.
Според Уставот, монархот нема никаква политичка моќ, но Тајланѓаните во кралот гледаат фактор на обединување во државата.
Додека стариот крал Бумибол, кој 70 години беше на престолот, се уште беше жив, домашните медиуми посочуваа дека принцот Маха ја нема неговата популарност, како и дека неговата сестра е поомилена во јавноста.