Додека акробатската екипа на италијанското Воено воздухопловство „Фрече Триколори“ ги поздрави лидерите на Г-7 на Сицилија исцртувајќи ги боите на италијанското знаме на небото, група еколози организираа протести на брегот во близина на собирот.
Лидерите на седумте најразвиени земји во светот летачката акробација ја набљудуваа од градината на елитниот хотел „Сан Доменико Палас“ во Таормина, каде се одржува самитот на Г-7.
Активистите на еколошките организации „Гринпис“ и „Оксфам“ протестираа поради климатските промени, што е едно од најпроблематичните прашања на агендата на дводневниот состанок.
Активистите на „Гринпис’ со осум кајаци на море раширија транспаренти со пораки меѓу кои беше и „Планетата Земја на прво место“.
На брегот поставија своја Статуа на слободата, висока четири метри, со појас за спасување како симбол на страдањето на мигрантите и закана од зголемување на нивото на морето, што е последица на климатските промени.
Активистите на „Оксфам“ носеа маски со ликовите на седумте лидери и транспарент на кој пишуваше „Договор од Париз“, чие напуштање го најави претседателот на САД, Доналд Трамп.