Рускиот претседател Владимир Путин не е искрен за мировните преговори со Украина и ја носи војната на ново ниво на варварство обидувајќи се да убие цивили, изјави вчера висок американски дипломат.
Американскиот потсекретар за политички прашања Викторија Нуланд се состана со претседателот Володимир Зеленски и други високи украински претставници во Киев за да покаже поддршка додека Русија се обидува да ја уништи енергетската инфраструктура на земјата.
„Дипломатијата очигледно е цел на сите, но мора да имате подготвен партнер“, им рече таа на новинарите. „И многу е јасно, без разлика дали станува збор за нападите врз енергетската инфраструктура, дали се работи за реторика од Кремљ и општиот став, дека Путин не е искрен или подготвен за тоа.
Американскиот претседател Џо Бајден изјави во четвртокот дека е подготвен да разговара со Путин доколку рускиот лидер е заинтересиран да стави крај на војната. Но, идејата беше брзо закопана кога Кремљ рече дека Западот мора да ја признае анексијата на четири украински региони од Москва. Ваквата реакција на Русија, рече Нуланд, покажа „колку тие се несериозни“.
Русија ја напаѓа украинската електрична и топлинска инфраструктура од октомври, во, како што велат Киев и неговите сојузници, намерна кампања против цивилите, што е воено злосторство.
„Путин ја однесе оваа војна на ново ниво на варварство, внесувајќи ја во секој дом на Украина додека се обидува да ги исклучи светлата и водата и да го постигне она што не можеше да го направи на бојното поле“, рече Нуланд.
Портпаролката на руското Министерство за надворешни работи Марија Захарова брзо реагираше.
„Не е на Нуланд да го учи светот – САД и НАТО уништуваа енергетските мрежи“, објави Захарова на Телеграм, потсетувајќи на нападите врз Србија во 1999 година.
Според НАТО за време на нападите, борбените авиони ја исклучија електричната енергија на повеќе од 70 отсто од областите во Србија.