На иницијатива на папата Франциско денеска во Ватикан ќе се одржи заедничка молитва за мир на која ќе учествуваат израелски и палестински претставници, а ќе им се придружат и патријархот Вартоломеј, имами, рабини, верници и сите луѓе со добра волја.
Според желбите на Папата ова е аполитичка средба, молитва во градините на Ватикан, а до средбата не се очекува конкретна политичка иницијатива.
Лидерите Перес и Абас во Рим пристигнуваат одвоено, следени од рабини и имами.
Папата Франциско во градините на Ватикан ќе седи меѓу двајцата претседатели, а цариградскиот патријарх Вартоломеј во нивна непосредна близина.
Молитвата е поделена на три дела, еврејска, христијанска и на крајот муслиманска молитва.
По молитвата учесниците ќе засадат маслиново дрво, што е вообичаен гест на средбите на кои се молат за мир.