Европската Унија предупреди дека Европа се соочува со „многу сериозна криза“ поради падот на снабдувањето со гориво за авиони предизвикан од војната во Иран, што би можело да ги принуди патниците да ги променат своите планови за одмор ова лето, објави Скај њуз.
„За жал, многу е веројатно дека одморите на многумина ќе бидат засегнати, или од откажувања на летови или од многу, многу скапи билети“, рече европскиот комесар за енергетика, Дан Јоргенсен. „Дури и ако направиме сè што е во наша моќ, ако нема гориво за авиони, тогаш нема гориво за авиони“.
„Во моментов, тоа е првенствено ценовна криза, сè уште не криза на снабдувањето, но за жал не можеме да бидеме сигурни дека, ако кризата продолжи, ќе спречиме и криза на снабдувањето во иднина, особено со горивото за авиони“, додаде тој.
„Ако од утре владее мир и се отвори Ормутскиот теснец, мислам дека ќе успееме, но морам да кажам дека дури и во најдобар сценарио, ценовната криза ќе трае некое време“, предупреди тој. „Гасната инфраструктура е толку уништена што ќе бидат потребни години за нејзина обнова, што значи дека со месеци, а можеби и со години, очекуваме многу повисоки цени отколку пред почетокот на оваа криза.“
Меѓународната агенција за енергија предупреди дека во следните пет до шест недели може да се појават големи проблеми со снабдувањето. Авиокомпаниите веќе преземаат чекори за намалување на побарувачката: групацијата „Луфтханза“, една од најголемите авиокомпании во Европа, објави откажување на 20.000 летови во наредните месеци. Други авиокомпании ги зголемуваат цените на летовите на долги релации за да ги покријат зголемените трошоци за гориво.
Шефот на италијанската Управа за цивилно воздухопловство изјави за „Скај њуз“ дека луѓето треба да размислат да ги поминат летните одмори во своите матични земји.
„Во минатото, цените на горивото достигнуваа и надминуваа 100 долари без значителни последици за воздушниот сообраќај, но овој пат е поинаку – психолошкиот ефект има разорно влијание врз патниците“, предупреди Пјерлуиџи ди Палма.
„Најдобро е да се препорачаат одмори во близина. За оние кои сè уште сакаат да го преземат ризикот од долго патување, добра идеја е да размислат за специјално осигурување кое може да гарантира враќање на средствата во случај на доцнење или откажување на летови.“
ЕУ објави мерки за ограничување на влијанието на енергетската криза, вклучувајќи планови за забрзување на употребата на обновливи извори на енергија и стимулации за домаќинствата да инсталираат системи за чиста енергија како што се топлински пумпи и соларни панели. Унијата, исто така, ги охрабрува земјите-членки да ги намалат даноците на електричната енергија со надеж дека ова ќе охрабри повеќе луѓе да купуваат електрични возила.