Американскиот претседател Доналд Трамп првично не бил убеден дека САД треба воено да возвратат на Иран откако во вторникот беше соборен воен хеликоптер „Апачи“, дознава „Волстрит журнал“.
Според „Волстрит журнал“, Трамп го поминал поголемиот дел од денот минимизирајќи го инцидентот, велејќи им на новинарите дека тоа „не е голема работа“.
Сепак, ситуацијата целосно се смени по драматичната средба во Белата куќа. Трамп се предомислил дури по деталниот брифинг од министерот за одбрана Пит Хегсет и командантот на Здружениот штаб на американските вооружени сили, генерал Ден Кејн.
Агенцијата „Асошиејтед прес“ исто така објавува нови детали за несреќата. Според нивните извори, американскиот хеликоптер „Апачи“ се урна по директен судир со ирански дрон. Иако сè уште не е сосема јасно дали овој судир на небото бил намерен или несреќен случај, военото и безбедносното раководство го увериле претседателот дека инцидентот, без оглед на позадината, бара итен и остар воен одговор.
Веднаш по тој брифинг, Трамп целосно ги сменил ставовите. На својата социјална мрежа Truth Social, тој објави дека „Иран соборил хеликоптер“ и јавно изјави дека САД „мора да одговорат на овој напад“. Само неколку часа подоцна, американски воени авиони и ракети ги бомбардираа иранските позиции.