Најмалку четири лица се повредени во автомобилска незгода во центарот на Тел Авив, непосредно пред пристигнувањето на американскиот претседател, Доналд Трамп, соопштија израелските власти, цитирани од ДПА.
Полицијата настанот го оцени како сообраќајна незгода, иако се уште го истражува случајот. Првично во израелските медиуми беа изразени стравувања дека станува збор за напад со втурнување на автомобил во луѓе пред посетата на американскиот претседател
Трамп денеска пристигна во Израел од Саудиска Арабија. Тој одделно ќе се сретне со израелскиот премиер Бенјамин Нетанјаху и палестинскиот претседател Махмуд Абас во обид да заживеат мировните преговори, пренесоа британските медиуми.
Авионот на Трамп, „Ер форс 1“ слета на аеродромот „Бен Гурион“ по летот од Ријад, што е прв познат директен лет меѓу Саудиска Арабија и Израел.
На црвениот тепих на аеродромот американскиот претседател и првата дама Меланија Трамп ги пречекаа Нетанјаху и неговата сопруга Сара, како и израелскиот претседател Реувен Ривлин и членови на израелската Влада.